TƏBRİK EDİRİK!..Aprelin 5-i Gürcüstanda-yaşayıb-yaradan
dəyərli ziyalılarımızdan olan tanınmış alim,
gözəl və xeyirxah insan,
çox hörmətli professor
Mahmud Kamal oğlu Hacıxəlilovun
doğum günüdür!..
Daha doğrusu, Yubileyidir!..
Anadan olmasının 65 illik Yubileyi!..
Mahmud Kamal oğlu Hacıxəlilov (Keşəli) -
1954-cü il aprelin-5-də qədim Borçalı
mahalında - indiki Gürcüstan Respublikasının
Marneuli rayonundakı Keşəli kəndində
dünyaya göz açıb.
Səkkizillik məktəbi doğma Keşəli kəndində,
orta məktəbi qonşu Kəpənəkçi kəndində bitirib.
1971-1975-ci illərdə A.S.Puşkin adına Tbilisi Dövlət Pedaqoji İnstitutunun
Azərbaycan bölməsinin filologiya fakültəsini bitirib.
Elə həmin ildən “Sovet Gürcüstanı” qəzetində ştatdankənar müxbir kimi
əmək fəaliyyətinə başlayan Mahmud Kamaloğlu həmin illərdə parallel olaraq,
eyni zamanda həm də doğma kəndindəki Keşəli orta məktəbində müəllim işləyib.
1984-cü ildən isə daimi olaraq, “Sovet Gürcüstanı” (indiki "Gürcüstan") qəzetinə keçib, əvvəlcə
korrektor, daha sonra 1990-cı ilədək idman, gənclərlə kütləvi iş bölməsinin rəhbəri vəzifəsində çalışıb.
Müxtəlif mətbuat orqanlarında, məcmuə və toplularda neçə-neçə elmi və publisistik məqalələrin müəllifidir.
Hələ tələbəlik illərindən elmi tədqiqat işləri ilə məşğul olan M.Kamaloğlu Azərbaycan EA Coğrafiya İnstitutunun toponimika şöbəsinin dissertantı olub. 1989-cu ildə «Gürcüstan Respublikasının Cənubi-Şəqr rayonlarının (Dmanisi, Bolnisi, Marneuli, Qardabani) Azərbaycan mənşəli toponimləri» mövzusunda namizədlik dissertasiyası müdafiə edib, 1990-cı ildə Ali Attestasiya Komissiyasının qərarı ilə ona filologiya elmləri namizədi alimlik dərəcəsi verilib.
M.Kamaloğlu 1990-1991-ci ildə Tiflis Bazar İqtisadiyyatı və Hüquq Universitetində dekan,
1992-ci ildə Kvemo-Kartli Müstəqil Universitetində tədris və elmi işlər üzrə prorektor,
1998-ci ildən 2007-ci ilədək İ.Cavaxişvili adına Tiflis Dövlət Universitetinin Marneuli filialında
yenə də həmin vəzifədə, yəni tədris və elmi işlər üzrə prorektor vəzifəsində çalışıb.
2005-ci ildə İ.Cavaxişvili adına TDU-nun professoru seçilib.
2008-ci ildən Ukrayna-Gürcüstan
Beynəlxalq Universitetinin
tədris işləri üzrə prorektorudur.
M.Kamaloğlu hələ tələbəlik illərindən
“Sovet Gürcüstanı”, “Axali Marneuli” qəzetlərində publisistik məqalələrlə çıxış edib.
Müxbir kimi fəaliyyətə başlayandan sonra onun “Azərbaycan” və
“Kirpi” jurnallarında məqalə və felyetonlatı çap olunub.
M.Kamaloğlu indiyədək 10 kitabın müəllifidir.
O, bir çox xarici ölkələrdə təşkil olunan elmi konfranslar və
simpoziumlarda elmi məruzələrlə çıxış edib.
Mahmud müəllim həm də gözəl ailə başçısıdır, sevimli atadır, mehriban babadır.
Ömür-gün yoldaşı Pərixanımla birlikdə dörd dəyərli övlad böyüdüb boya-başa çatdırıblar.
Dördü də ali təhsillidir, dördünün də gözəl ailəsi və gözəl balaları var.
Jurnalist Binnət Əlioğlu hələ 1991-ci ildə «Gürcüstan» qəzetinin 27 iyul tarixli sayında
dərc etdirdiyi «Narahatlıqdan doğan sevinc» sərlövhəli məqaləsində alim-müəllim-jurnalist
Mahmud Keşəlinin həyat və fəaliyyəti haqqında oxuculara məlumat vermiş və qeyd etmişdir ki,
"M.Keşəli gəncdir. Onun elmi müvəffəqiyyətləri hələ irəlidədir. Arzu edirik ki, yaxın vaxtlarda
qəzetlərdən onun filologiya elmləri doktoru olması xəbərini də oxuyaq."
Bəli, biz də bu gözəl və səmimi arzuya qoşuluruq. Əminik ki, o gün uzaqda deyil.
Çünki Mahmud müəllimin işgüzarlığı, son vaxtlar dərc etdirdiyi kitabları, elmi məqalələri,
respublika və beynəlxalq elmi konfrans və simpoziumlardakı çıxışları, bir-birindən dəyərli
məruzələri haqqında həmişə xoş sözlər, müsbət fikirlər eşidirik.
Və fürsətdən istifadə edərək, biz də
ZiM.Az-ın yaradıcı heyəti adından
dəyərli ziyalımız, gözəl və xeyirxah insan,
çox hörmətli professor
Mahmud Kamal oğlu Hacıxəlilovu
doğum günü münasibətilə ürəkdən təbrik edir,
ona uzun ömür, möhkəm cansağlığı,
şəxsi həyatında və elmi-pedaqoji fəaliyyətində
yeni-yeni uğurlar arzulayırıq!..
Bir sözlə, həmişə sizin şad xəbərinizi gözləyirik,
əziz və hörmətli Mahmud müəllim!..
Müşfiq BORÇALI
ZiM.Az
Bax: Mənbə: Müşfiq BORÇALI. Çağdaş Borçalı ədəbi məktəbi.
Bakı, "Azərbaycan" nəşriyyatı, 1994, səh. 198-199.
.
.
© Müəllif hüquqları qorunur. Məlumatdan istifadə etdikdə istinad mütləqdir.
