“CMA CMİTAN CLİERİ” – “Borçalı” Cəmiyyətinin sədri Kərəm Məmmədli “Sadaxlı El Şənliyi”nə qatıldı

“CMA CMİTAN CLİERİ” – “Borçalı” Cəmiyyətinin sədri Kərəm Məmmədli “Sadaxlı El Şənliyi”nə qatıldı Tədbirdə Kərəm Məmmədlinin çıxışını qubernator başda olmaqla, bütün rəsmilər ayaqüstə alqışladı

“Orta əsrlərdə indiki Gürcüstanda kartvel dili ilə yanaşı, türk dilində də danışılıb”


Bu gün – iyulun 30-da Borçalının ən böyük kəndlərindən biri olan Sadaxlıda el şənliyi keçirilib. Əldə etdiyimiz məlumata görə, “Sadaxlı El Şənliyi” adı altında keçirilən tədbirdə qonaq qismində Gürcüstanın Kvemo-Kartli (Borçalı) bölgəsinin qubernatoru Paata Xizanişvili, Marneuli rayon rəhbərliyi və “Borçalı” İctimai Cəmiyyətinin sədri, tarixçi alim Kərəm Məmmədli də iştirak ediblər.

“Sadaxlı El Şənliyi”ndə çıxış edən “Borçalı” İctimai Cəmiyyətinin sədri tədbir iştirakçılarını salamladıqdan sonra, Gürcüstan və Azərbaycan xalqları arasındakı dosluqdan söhbət açıb. Kərəm Məmmədli bildirib ki, Borçalı türkləri hələ 2300 il əvvəl öz torpaqlarını düşməndən qorumaq üçün gürcülərlə yanaşı mücadilə aparıb:
“Keçən əsrin 80-ci illərində bir aşıq mahnısı var idi – “Qəribəm” mahnısı. Ancaq, demək istəyirəm ki, siz qərib deyilsiniz. Hələ 2300 il bundan əvvəl sizin babalarınız - buntürklər gürcülərin əcdadları ilə birlikdə Makedoniyalı İskəndərin ordularına qarşı döyüşmüşlər. Alban hökmdarı Cavanşirlə İber knyazı Atrnersex birlikdə Qafqaza soxulan Sasaniləri darmadağın eləmişlər.

“Kartlis Sxovreba”nın yazdığına görə, erkən orta əsrlərdə indiki Gürcüstanda kartvel dili ilə yanaşı, türk dilində də danışılıb”.

“Borçalı” İctimai Cəmiyyətinin sədri daha sonra tədbirdə iştirak edən gürcülərə öz dillərində müraciət edib:
“Mən tədbirdə iştirak edən gürcü dostlara imperiya (rus) dilində yox, onların öz dillərində müraciət etmək istəyirəm: “CMA CMİTAN CLİERİ”(Qardaş qardaşı ilə güclüdür – müəl.).

Qeyd edək ki, K.Məmmədlinin bu çıxışını Kvemo-Kartli (Borçalı) bölgəsinin qubernatoru Paata Xizanişvili və Marneuli rayon rəhbərliyi ayaqüstə alqışlayıblar.
Cəmiyyət sədri onu da deyib ki, Tiflis şəhəri təkcə Borçalı türkləri üçün deyil, hər bir Azərbaycan vətəndaşı üçün əzizdir:

“Azərbaycanın müstəqilliyi 1918-ci ilin mayında Tiflisdə elan olunduğundan, bu şəhər bizim üçün əzizdir”.

Tarixçi alim çıxışında onu da vurğulayıb ki, 1919-cu il 29 avqust tarixində Azərbaycanla Gürcüstan arasında rus müstəmləkəçilərinə qarşı hərbi ittifaq bağlanması da yaddaçlardan silinməməlidir. Onun fikrincə, bütün bu faktlar hər iki dövlətin tarixən səmimi qonşuluq münasibətində olduğunun göstəricisidir.


P.S. Tədbir haqda geniş məlumat verməyə çalışacağıq.


.
© Müəllif hüquqları qorunur. Məlumatdan istifadə etdikdə istinad mütləqdir.
Rəy yazın: