“Türk xalqları ədəbiyyatı: mənşəyi, inkişaf mərhələləri və problemləri” mövzusunda Beynəlxalq elmi konfrans

Dekabrın 1-də AMEA-nın Əsas binasında Ədəbiyyat İnstitutunun təşkilatçılığı ilə “Türk xalqları ədəbiyyatı: mənşəyi, inkişaf mərhələləri və problemləri” mövzusunda Beynəlxalq elmi konfrans işə başlayıb.

İki günlük beynəlxalq tədbirdə Türkiyə, Özbəkistan, Türkmənistan, Qazaxıstan, Qırğızıstan və digər türkdilli ölkələrin tanınmış alim və mütəxəssisləri iştirak ediblər.

Konfransı giriş sözü ilə açan AMEA-nın vitse-prezidenti, Ədəbiyyat İnstitutunun direktoru, akademik İsa Həbibbəyli Türk xalqları ədəbiyyatına həsr olunmuş konfransın böyük əhəmiyyət kəsb etdiyini vurğulayıb. Bildirib ki, bu, müstəqillik illərində Bakıda keçirilən Türk xalqları ədəbiyyatına həsr olunmuş ilk konfransdır. Beynəlxalq tədbirdə 8 ölkədən 94 alim iştirak edir.

AMEA-nın vitse-prezidenti tədbirin keçirilməsinin məqsədinin Türkdilli xalqların mədəni və ədəbi inteqrasiyasının daha da surətləndirmək, son illər ədəbiyyat sahəsində aparılan elmi-tədqiqat işlərini, türkdilli xalqların ədəbiyyatları qarşısında duran problemlərin həlli yollarını müzakirə etmək, təcrübə mübadiləsi aparmaq olduğunu bildirib.

Son illər ortaq türk ədəbiyyatının öyrənilməsi və elmi araşdırılması istiqamətində mühüm addımların atıldığını söyləyən akademik İsa Həbibbəyli Beynəlxalq Türk Akademiyası təsis edildikdən sonra Türk dövlətləri arasında ədəbi-mədəni əlaqələrin genişləndiyini, dostluq münasibətlərinin daha da möhkəmləndiyini dilə gətirib.

Sonra çıxış edən Azərbaycanda Atatürk Mərkəzinin müdiri, Əməkdar Elm Xadimi, AMEA-nın müxbir üzvü Nizami Cəfərov bildirib ki, Türk xalqları ədəbiyyatının müstəqil tədqiqi ortaq türk ədəbiyyatının öyrənilməsindən başlanılmalıdır. Türkdilli xalqların hələ də açılmamış zəngin ədəbi xəzinəsinin mövcud olduğunu söyləyən alim qeyd etdi ki, bu xəzinənin açılışı nəinki Türkdilli xalqların ədəbiyyatının, həm də dünya ədəbiyyatının öyrənilməsində böyük əhəmiyyət kəsb edir: “Ən məşhur rus alimləri də etiraf ediblər ki, Türk dilini bilmədən, Türk ədəbiyyatını öyrənmədən dünya ədəbiyyatının tam elmi və müfəssəl dərki mümkün deyildir”.

Tədbirdə çıxış edən Folklor İnstitutunun direktoru, AMEA-nın müxbir üzvü Muxtar İmanov, professor Mesut Şen (Türkiyə), dos.Dr. Rahmatulla Barakayev (Özbəkistan), dos.Dr. Seyfəddin Altaylı (Türkiyə), professorlar Məmməd Əliyev, Məhərrəm Qasımlı və başqaları bu cür konfransların təşkilinin Türk xalqlarının ədəbi, dil, mədəni birliyinə və onların bir-birinə daha da yaxınlaşmasına xidmət etdiyini söyləyiblər, konfransın işinə uğurlar diləyiblər.

Konfrans öz işini plenar iclaslar üzrə davam etdirib.