2017-ci il fevralın 8-də AMEA-nın Mərkəzi Elmi Kitabxanasında bu qurumun və Azərbaycan Mətbuat Şurasının birgə təşkilatçılığı ilə “İnformasiya təminatında mövcud durum: media və kitabxana əməkdaşlığı” mövzusunda tədbir keçirilib.AMEA Mərkəzi Elmi Kitabxananın İctimaiyyətlə Əlaqələr bölməsindən ZiM.Az-a bildiriblər ki, tədbiri giriş sözü ilə açan AMEA-nın vitse-prezidenti, akademik, millət vəkili İsa Həbibbəyli Akademiyada ilk dəfə olaraq media ilə geniş tərkibli görüş keçirildiyini vurğulayıb.
İ.Həbibbəyli Mərkəzi Elmi Kitabxananın gördüyü işlərdən, xidmətin səviyyəsindən, vikipedia təlimlərindən, Milli Rəqəmsal Yaddaş bazasından, keçirilən tədbirlərdən, fondlardakı nadir incilərdəndə bəhs edərək onları qənaətbəxş adlandırıb.
İ.Həbibbəyli bu işlərin geniş ictimaiyyətə çatdırılması üçün medianın müstəsna rol oynadığını vurğulayaraq qarşılıqlı faydalı əməkdaşlığın daha da inkişaf etdirilməli olduğunu qeyd edib. İ.Həbibbəyli kitaba marağın artdığını və buna görə də AMEA-nın kitabxanaya ikinövbəli rejimdə çalışmaq üçün dəstək verdiyini açıqlayıb.
O, elmi jurnalistikanı inkişaf etdirməyin də vacib olduğunu önə çəkib.
Mətbuat Şurasının sədri, millət vəkili Əflatun Amaşov AMEA-nın özünün inkişaf dövründə olduğunu qeyd edib.
O, bütün məsələlərə, xüsusən də problemli məqamlara elmin süzgəcindən keçirilərək baxılmalı olduğunu söyləyib.
Media-kitabxana əməkdaşlığlını gücləndirməyə çalışdıqlarını deyən millət vəkili informasiya əldə olunmasında kitabın, kitabxananın böyük rolu olduğunu açıqlayıb.
Ə.Amaşov bütün media işçilərinin kitabxanadan rahat bir şəkildə istifadəsini təmin etməyi təklif edib.
“Bu özülüyündə kitaba bağlılığı daha da gücləndirmiş olar” – deyə çıxışçı vurğulayıb.
Ə.Amaşov Mətbuat Şurasında təmsil olunan media qurumlarının görülən işlərə informasiya dəstəyi verməsini gündəmə gətirib.
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli AMEA-da çalışan alimlərin fəaliyyətinin mediada az işıqlandırıldığını qeyd edib. O, əlaqələrin gücləndirilməli olduğunu söyləyib.
V.Səfərli KİV Dəstək Fondunun gördüyü işlərdən bəhs edib.
O, əlaqələrin genişlənməsindən hər iki tərəfin qazanacağını deyib.
Çıxışçı qəzetlərin öz nüsxələrindən kitabxanaya göndərmələrini təklif edib.
AMEA Mərkəzi Elmi Kitabxanasının (MEK) direktoru Leyla İmanova tədbirin mahiyyəti haqqında məlumat verərək, Azərbaycan üçün önəmli olan vətəndaş birliyini çox həssas sahə olan informasiya sahəsində media və kitabxana əməkdaşlığı nümunəsində bir daha nümayiş etdirməyin, informasiya təminatı sahəsində media və kitabxananın məsuliyyətlərinin kəsişən nöqtələrini tapmağın əsas məqsəd olduğunu vurğulayıb. O, deyib ki, MEK görülən işləri operativ şəkildə mek.az saytında, sosial şəbəkələrdə paylaşmaqla ictimaiyyətə çatdırır.
Hazırda MEK-in oxucular üçün yüksək səviyyəli şərait yaratdığını deyən L.İmanova Mətbuat Şurası ilə əməkdaşlıq məsələsində təkliflərlə çıxış edib:
“MEK Şura üzvləri olan jurnalistlərə akademiya üzvləri üçün olan şərtlər ilə oxucu vəsiqələri verə və növbədənkənar xidmət göstərə bilər.
Jurnalist araşdırmaları və yazıları hazırlayan media nümayəndələrini etibarlı elmi mənbələrlə təmin edə bilər”.
Direkotr media ilə perspektivdə görülməsi nəzərdə tutulan addımları da açıqlayıb. Media ilə gündəlik kommunikasiyanın onlayn avtomat rejimə keçirilməsi; VİS-in müəyyən komponentlərinin sayt ilə sinxronlaşdırılması; Kitabxana həyatından MEK-in saytına canlı yayımlanma; MEK-in elektron resurslarına şəxsi kabinetdən çıxış; Kommunikasiyanın daha əlçatan və sürətli olması; MEK-in saytının yeni versiyasının hazırlanması.
“Şərq” qəzetinin baş redaktoru Akif Aşırlı jurnalistlərin peşəkarlıq baxımından elmi faktlardan yararlanmasının mühüm olduğunu qeyd edib.
Kitabların, əski qəzetlərin elektronlaşmasını mühüm amil kimi dəyərləndirən A.Aşırlı səslənən təkliflərin həyata keçməsini arzulayıb.
O, eyni zamanda Azərbaycandakı kitabxanaların öz elektron kataloqlarını birləşdirmələrini təklif e0dib.
“Olaylar” qəzetinin baş redaktoru Yunus Oğuz alimlərin jurnalistlərdən narazı olmasını, media nümayəndələrinin elmdən uzaq olmasını söyləyərək təkliflə çıxış edib.
Y.Oğuz kitabxananın imkanlarından internet vasitəsilə istifadə olunması, bir sıra görüşlərin, ədəbi-bədii, elmi tədbirlərin keçirilməsini də təklif kimi səsləndirib.
Jurnalist Ekspert Mərkəzinin sədri Ceyhun Musaoğlu MEK-in jurnalistlər üçün təklif etdiyi xidmətləri yüksək dəyərləndirib.
O, eyni zamanda kitabxanada vikipedia ilə bağlı görülən işləri yüksək qiymətləndirib.
Tədbirdən sonra Mərkəzi Elmi Kitabxananın fəaliyyəti ilə tanış olmaq üçün media nümayəndləri üçün mediatur təşkil olunub.
Müşfiq BORÇALI,
ZiM.Az
.
Muəllif huquqları qorunur. Məlumatdan istifadə etdikdə istinad mutləqdir.
