TƏBRİK EDİRİK, ELMAN KƏLƏYEV!..

Gürcüstanda azərbaycandilli qəzetin
redaktor müavini Elman Kələyev
"Əməkdar Jurnalist"
fəxri adına layiq görülüb

Gürcüstanda nəşr olunan azərbaycandilli "Gürcüstan" qəzetinin redaktor müavini
Elman Hüseyn oğlu Kələyev
Gürcüstan jurnalistikasında uzunmüddətli
uğurlu fəaliyyət göstərdiyinə görə
bu günlərdə "Əməkdar Jurnalist"
fəxri adına layiq görülüb.

ZiM.Az-ın Gürcüstan bürosunun
Tiflisdən verdiyi məlumata görə,
bu barədə 2015-ci il, mayın 12-də
Gürcüstan Jurnalistlər İttifaqı
İdarə heyətinin sədri Hamlet Qeqia
sərəncam imzalayıb.

Elman Hüseyn oğlu Kələyev - 1949-ci il oktyabrın 20-də qədim Borçalı mahalının Sarvan kəndində
(indiki Gürcüstanın Marneuli şəhərində)
qulluqçu ailəsində anadan olub.
1957-ci ildə Marneuli şəhərindəki 2 nömrəli Azərbaycan orta məktəbinin birinci sinfinə gedib
və 1967-ci ildə həmin məktəbi bitirib.
Orta məktəbi bitirdikdən sonra Bakı şəhərindəki Azərbaycan Politexnik İnstitutunun avtomobil yollarının istismarı fakültəsinə daxil olub və
üçüncü kursadan sonra təhsilini dayandıraraq Gürcüstana qayıdıb.
O, 1970-ci ildə Tiflisdəki A.S.Puşkin adına Tiflis Dövlət Pedaqoji İnstitutunun pedaqoqika fakültəsinə daxil olub, 1974-cü ildə həmin fakültəni müvəffəqiyyətlə bitirib.

E.Kələyev institutdan sonra hələ tələbə ikən müntəzəm əlaqə saxladığı Tiflisdə nəşr olunan “Sovet Gürcüstanı” qəzetində ştatdankənar müxbir vəzifəsində çalışıb.
1974-cü ilin noyabr ayından
ali təhsilli mütəxəssis kimi Odessa şəhərində hərbi xidmətdə olub.
Hərbi xidmətdən tərxis edildikdən sonra yenidən “Sovet Gürcüstanı” qəzetində fəaliyyətini
davam etdirib.
1979-cu ilin mayın 15-də “Sovet Gürcüstanı” qəzetinin ştatdankənar şöbəsinin müdiri vəzifəsinə təyin edilib.
1980-ci il sentyabrın 1-dən 1982-ci il iyunun 31-dək Bakı Ali Partiya Məktəbində təhsil alıb.
Həmin il yenidən “Sovet Gürcüstanı” qəzetində müxbir vəzifəsində çalışıb.
1984-cü il mayın 4-də baş müxbir, 1989-cu il fevralın 4-də
redaksiyanın kənd təsərrüfatı şöbəsinin müdiri təyin olunub və redaksiya heyətinin üzvü seçilib.
1991-ci il oktyabrın 10-da “Gürcüstan” (keçmiş "Sovet Gürcüstanı") qəzetinin məsul katibi təyin edilib.
2014-cü ilin noyabr ayından isə redaktor müavini vəzifəsində çalışır.

1974-cu ildən indiyədək "Gürcüstan" qəzetində müxtəlif vəzifələrdə çalışan
Elman Kələyev Azərbaycan dilində çıxan bir neçə ədəbi-bədii və lüğət kitablarının redaktoru olub
və “Gürcüstan Konstitusiyası”, seçki haqqında məcəllələri və müxtəlif nəşrləri redaktə edib.

O, Gürcüstanda nəşr olunan “Əhli-Beyt” jurnalının baş redaktoru olub,
Türkiyənin "Anadollu" agentliyinin Gürcüstan təmsilçiliyində çalışıb.
2005-ci ildən APA-nın (Azəri-Press Agentliyinin) Gürcüstan bürosunun əməkdaşı vəzifəsində çalışıb.
Jurnalistika sahəsində çalışarkən Elman Kələyev Gürcüstanın və Azərbaycanın bir sıra mərkəzi qəzet və
jurnallarında, radio verilişlərində, eləcə də Moskvada nəşr edilən “Panorama Azerbaycana” qəzetində
müxtəlif səpgili yazılarla müntəzəm çıxış edib.


Müşfiq BORÇALI.
ZiM.Az


.