2017-ci il noyabrın 17-də Azərbaycan Texniki Universitetinin İdman Sarayının əsaslı təmirdən sonra açılış mərasimi keçirilib.Tədbirdə Prezident Administrasiyasının gənclər siyasəti və idman məsələləri şöbəsinin müdiri, Birinci vitse-prezidentin köməkçisi Yusuf Məmmədəliyev, Təhsil naziri Mikayıl Cabbarov, Gənclər və idman naziri Azad Rəhimov, Azərbaycan Milli Olimpiya Komitəsinin (MOK) vitse-prezidenti Çingiz Hüseynzadə, MOK baş katibinin müavini, Azərbaycan Ağır Atletika Federasiyasının vitse-prezidenti Azər Əliyev, Azərbaycan Respublikasının Prezidenti yanında Gənclər Fondunun icraçı direktoru Fərhad Hacıyev, millət vəkilləri, universitetlərin rektorları, ölkəmizin idman və təhsil ictimaiyyətinin, gənclər təşkilatlarının nümayəndələri iştirak ediblər.
İdman sarayı ilə tanış olan qonaqlara məlumat verilib ki, İdman Sarayının təməli ümummilli lider Heydər Əliyevin iştirakı ilə qoyulub. Məhz Ulu Öndərin şəxsi nəzarəti altında 1973-cü ildə sarayın tikintisi başa çatdırılaraq ali təhsil müəssisəsinin ixtiyarına verilib.
İştirakçılar İdman Sarayının basketbol, qılıncoynatma və digər zallarında yaradılan şəraitlə tanış olublar.
Bildirilib ki, bu idman qurğusunda təkcə universitetin tələbələri üçün deyil, peşəkar idmanla məşğul olmaq istəyən gənclər üçün hər cür şərait yaradılıb. Sarayın ümumi sahəsi 1804 kv-dir. İdman Sarayı 928 tamaşaçı üçün nəzərdə tutulub. Bu idman qurğusu ən yüksək beynəlxalq standartlara tam cavab verir. Burada trenajor, güləş, voleybol, basketbol, həndbol, futbol, badminton, qılıncoynatma, cüdo, boks və digər idman növləri ilə məşğul olmaq üçün mükəmməl şərait var.
Sonra İdman Sarayı ilə bağlı videoçarx nümayiş olunub.
İdman Sarayı ilə tanışlıqdan sonra dekabrda universitetlər arasında start veriləcək badminton turnirinin püşkü atılıb və yarışda mübarizə aparacaq 8 komandanın rəqibləri müəyyənləşib. Püşkün nəticələrinə görə, birinci turda “Azərbaycan Dillər Universiteti”nin komandası “Azərbaycan Memarlıq və İnşaat Universiteti”nin təmsilçiləri ilə üz-üzə gələcək. “Azərbaycan Texniki Universiteti”nin idmançıları isə “Azərbaycan Dövlət Neft və Sənaye Universiteti”nin təmsilçiləri ilə mübarizə aparacaqlar. “Bakı Dövlət Universiteti”nin komandası “Azərbaycan Dövlət Bədən Tərbiyəsi və İdman Akademiyası”nın tələbələrini sınağa çəkəcək. “Azərbaycan Tibb Universiteti”nin təmsilçiləri isə “Azərbaycan Dövlət İqtisad Universiteti”nin komandası ilə qarşılaşacaqlar.
Açılış mərasimindən sonra konsert proqramı təqdim olunub.
Sonda badminton üzrə Azərbaycan çempionatının kişilər arasında fərdi yarışlarının final oyunu keçirilib.
Qalimlərə mükafatlar verilib və xatirə üçün foto-şəkillər çəkilib.
ZiM.Az
.
Muəllif huquqları qorunur. Məlumatdan istifadə etdikdə istinad mutləqdir.
