2019-cu il fevralın 27-də Bakının Suraxanı rayonundakı Zığ qəsəbə Mədəniyyət Evində Zığ qəsəbəsində yerləşən Qəhrəman Qəhrəmanov adına 65 nömrəli tam orta məktəbin şagird, valideyn və müəllim kollektivi, Nardaran qəsəbə Mədəniyyət Mərkəzi ilə birlikdə, "Şərqin səsi" və "Elm və təhsil" qəzetlərinin informasiya dəstəyi ilə "Speak Ali" Tanıtım Seminarı keçirildi.
Məqsəd ilk öncə Zığ qəsəbə Mədəniyyət Evini və burada yenidən təşkil olunacaq dərnəkləri şagirdlərin, valideynlərin və müəllimlərin nəzər-diqqətinə çatdırmaq, uşaqların gələcəkdə savadlı böyüməsi üçün təşkil olunacaq dərnəklərə (müxtəlif musiqi dərnəkləri, rəsm dərnəyi və ingilis dili kursu) şagirdləri cəlb etmək, həmçinin ingilis dilində təşkil olunmuş "Speak Ali" layihəsini təqdim etmək idi.
Tədbiri giriş sözü ilə Zığ qəsəbə Mədəniyyət Evinin direktoru Kamran Musayev açdı. Göstərdikləri diqqət və qayğıya görə Bakı şəhər Mədəniyyət Baş İdarəsinin, Qəhrəman Qəhrəmanov adına 65 nömrəli tam orta məktəbin, "Şərqin səsi", "Elm və təhsil" qəzetlərinin rəhbərliklərinə öz dərin minnətdarlığını bildirdi. Kamran Musayev bu cür layihələrin vacibliyini və gələcəkdə mütəmadi şəkildə təşkil olunacağını vurğuladı.
Sonra Nardaran qəsəbə Mədəniyyət Mərkəzinin direktoru Asəf Qurbanov çıxış etdi. O, müasir dövrdə ingilis dilinin öyrənilməsinin və şagirdlərin öz bilik və bacarıqlarını artırmaqları üçün dərnəklərə üzv olmalarının vacibliyindən danışdı.
"Speak Ali" layihəsin təsisçisi, Nardaran qəsəbə Mədəniyyət Mərkəzinin dərnək rəhbəri Əli müəllim bu layihənin 2018-ci ildə Maştağa qəsəbə Mədəniyyət Mərkəzində və Bakıxanov qəsəbəsində yerləşən Asudə vaxt Mərkəzində təşkil olunduğunu və perespektivli gənclərə dəstək məqsədilə keçirildiyini öz çıxışında qeyd etdi. Əli müəllim, öz çıxışında onu da qeyd etdi ki, bu layihə təkcə ingilis dili kursu ilə bitmir, həmçinin xüsusi turlar, yarışlar və festivallar təşkil olunacaq, qaliblər mükafatlandırılacaq. Əli müəllim çıxışını bitirəndən sonra könüllü şagirdlərlə ingilis dilində sual-cavab şəklində dialoq qurdu və kiçik yarışmanın dörd qalibi üçün ingilis dili kursunun ilk dərslərinin təmənnasız olacağını qeyd etdi.
Daha sonra Zığ qəsəbə Mədəniyyət Evinin bədii rəhbəri Könül Əhmədova çıxış etdi.
Tədbir yüksək əhval-ruhiyyə və xatirə üçün kollektiv foto çəkiliş ilə sona yetdi.
YUNİS QARAXANOV,
"Şərqin səsi", "Elm və təhsil" qəzetlərinin redaktoru,
"Zim.az" saytının xüsusi müxbiri.
ZiM.Az
.
Muəllif huquqları qorunur. Məlumatdan istifadə etdikdə istinad mutləqdir.
