"Borçalı ədəbi mühitinin formalaşma tarixi və bu günü".Məruzəçi - Müşfiq BORÇALI.
"Borçalı" İctimai Cəmiyyətinin təşkilatçılığı ilə Dədə Camal məclisinin "Borçalı ədəbi mühitinin formalaşma tarixi və bu günü" mövzusunda növbəti yığıncağı keçirilib.
Tədbirdə "Borçalı" İctimai Cəmiyyətinin sədri Zəlimxan Məmmədli çıxış edərək, rəhbərlik etdiyi qurumun fəaliyyətindən danışıb. O, yeni üzvlərin cəmiyyətə qəbul olunması, el məclislərinə səlahiyyətli nümayəndələrin təyin olunması, Abxaziyadakı seçkilərlə bağlı cəmiyyətin adından yazılmış etiraz bəyanatı, Gürcüstan prezidenti Mixeil Saakaşvilinin Bakı səfəri və səfərlə əlaqədar cəmiyyətin M.Saakaşviliyə ünvanlanmış müraciəti, Gürcüstandakı torpaq məsələləri ilə bağlı Qardabani rayonunun Nəzərli və Kosalı kənd camaatının Tiflisdə keçirdikləri piket və digər məsələlər barədə ətraflı söhbət açıb.
İdarə heyətinin üzvü Mədəd Coşqun 18-23 mart tarixində "Borçalı" Cəmiyyətinin nümayəndə heyətinin Qardabani, Marneuli, Bolnisi, Dmanisi rayonlarında, Rustavi və Tiflis şəhərlərində Novruz şənliklərində iştirakı haqqında məlumat verib.
Tədqiqatçı-alim Müşfiq Çobanov "Borçalı ədəbi mühitinin formalaşma tarixi və bu günü" mövzusunda geniş məruzə edib. O, Borçalı ədəbi mühitinin çox zəngin olduğunu diqqətə çatdıraraq, bu sahədə aparılan tədqiqatlardan danışıb: "Tarixi Azərbaycanın ərazisi yalnız Azərbaycan Respublikasının indiki sərhədləri hüdudlarında olmayıb. Borçalı, Göyçə, Dəmirqapı Dərbənd mahalları da ən qədim dövrlərdən türk torpaqları olub. Burada tarixən Azərbaycan türkləri yaşayıb-yaradıblar. Əslən Borçalıdan olan ədəbiyyatşünas alimlərdən D.Əliyeva, Ə.Saraclı, Ş.Qurbanov, A.Hacıyev, A.Mişiyev, V.Osmanlı, V.Hacıyev, eləcə də M.Çobanov, H.Vəliyev, Ş.Məmmədli, H.Məmmədli, E.Məmmədli, R.Məmmədli, Ş.Şamıoğlu, T.İsabalaqızı və başqaları bu sahədə bir sıra təqdirəlayiq axtarışlar aparıblar. Qədim tarixə malik olan Borçalı ədəbi mühitini üç dövrə bölsək, deməliyik ki, xalq ədəbiyyatının zənginliyi ilə seçilən Borçalı ədəbi mühitinin I dövrünün barı hələ tam toplanıb öyrənilməyib. Borçalı ədəbi mühitinin II dövrü XIX-XX yüzillikləri, daha dəqiq desək, XIX əsrin əvvəllərindən, XX əsrin 20-ci illərinədək olan dövrü əhatə edir. Borçalı ədəbi mühitinin III dövrü isə XX yüzilliyin 20-30-cu illərindən daha da canlanmağa başlayıb. Azərbaycan milli mətbuatının yaranmasında və inkişafında da Tiflis ədəbi mühitinin xüsusi rolu olub".
Məruzə ətrafında şair Abbas Abdulla, əməkdar jurnalist İlyas Adıgözəlli və başqaları çıxış ediblər. Natiqlər Borçalı mühitinin aşıq havaları üstündə kökləndiyini xüsusi vurğulayıblar.
"Borçalı" cəmiyyətinin sədri Zəlimxan Məmmədli isə Azərbaycan ədiblərinin və gənc şairlərin şeirlərinin gürcü dilinə tərcümə edilməsini əhəmiyyətini diqqətə çatdırıb. O, bu istiqamətdə proqramlar işlənib hazırlanmasını vacib sayıb.
Sonda Borçalıdan gəlmiş ustad sənətkar Aşıq Məhəmməd Sadaxlı, Aşıq Əşrəf, Aşıq Fikrət və başqaları çıxış edərək öz ifaları ilə tədbiri şənləndiriblər.
My Webpage
© Müəllif hüquqları qorunur. Məlumatdan istifadə etdikdə istinad mütləqdir.
