İNCƏ DUYĞULAR ŞAİRİ

İNCƏ DUYĞULAR ŞAİRİ Şairlik saf qəlbin güzgüsü, aynasıdır.
O qəlbin ki, onda mərhəmət, ədalət, kövrəklik, məhəbbət yuva salıb.
O ürəyin könül quşu, ürəklərə qonur, bülbül axtardığı gülün budağında fəğan edir, saf eşqin sərrafına çevrilir.

Bu mərhəmətli qəlb həmişə axtarışda, görmək istədiyi dünyanı qəlb dolusu poetik misralarda səsləndirən şairə Gülsəfa Ayvazovanın könül zirvəsinə gedən yola güzgü tutur.

Bu qəlb ki, onu tanıyanların hamısına tanışdır:

Bilir ellər saf arzumu,
Mən xoş niyyət şairiyəm.
Ürəyi saf sevgi dolu
Mən ülviyyət şairiyəm.

Puç olmasın mərd niyyəti,
Heç gülməsin bəd niyyəti.
Bayraq etdim ülviyyəti,
Mən sədaqət şairiyəm.

Leyli nisgilli, Əsli atəşli Gülsəfa xanımın şeirləri nisgilli qəlbin acısının, həsrətin təlatümləri, fırtınasıdır. O, döyünən qəlbinin təlatümlü dalğasının hissini, həyacanını ara vermədən könüllərə köçürür. Təmiz qəlblə yazır, ürəyi istədiyi kimi yazır. Onun sevgisi safdır, bəhanəsizdir. Bəzən qafiyə gözləmədən belə ürək səsini, könül çırpıntılarını oxucuya çatdıra bilir. Nə çatdırırsa ürəkdən çatdırmaq istəyir. Kindən, küdurətdən uzaq ürək səmimidir, riyakarlıqdan uzaqdır.

Yenə yanan qəlbim dolub hardasan?
Yar həsrətdən oda yanır hardasan?
Qərarlaşıb sənlə peyman bağladıq,
Əhdimiz də oda yanır, hardasan? -

kimi saf etiraflar onun şeir dünyasını daha da gözəlləşdirir.

Bir günəş olaydım azad elimdə,
Bir qılınc olaydım mərdin əlində
Bir haqq söz olaydım insan dilində,
İftira, böhtandan uzaq olaydım.

- misraları bu qəlbə sanki bir ayna - güzgü tutur.
Sərraf süzgəclərdən keçdikcə, yazdıqlarına həmişə qayıdıb yenidən nəzər saldıqca onun ürək sözlərinin - şeirlərinin daha da seviləcəyinə inanıram.
Elə buna görə də, hörmətli qələm dostumuz Gülsəfa xanım Ayvazovanı ikinci şeirlər kitabının nəfis şəkildə işıqüzü görməsi münasibətilə ürəkdən təbrik edir və ona yen-yeni yaradıcılıq uğurları arzulayırıq!..


İlyas Əfəndi VƏFALI
Şair, publisist

ZiM.Az


.
© Müəllif hüquqları qorunur. Məlumatdan istifadə etdikdə istinad mütləqdir.
Rəy yazın: