AzTU-nun rektoru Vilayət Vəliyevin yeni tədris ilinin başlaması münasibətilə təbriki

AzTU-nun rektoru Vilayət Vəliyevin yeni tədris ilinin başlaması münasibətilə təbriki Əziz tələbələr!

Hörmətli professor-müəllim heyəti və əməkdaşlar!

Sizin hər birinizi yeni tədris ilinin başlaması, universitet auditoriyalarında ənənəvi təhsilə qayıtmağınız münasibətilə ürəkdən təbrik edirəm!


Bir ildən çox müddətdə siz universitetdə bilavasitə olmasanız da, məsafədən, onlayn formatda olsa da universitetimizin xalqımız və dövlətimiz qarşısındakı missiyasının uğurla yerinə yetirilməsində öz əvəzsiz töhfənizi verdiniz. Keçən dövr ərzində mən bir daha əmin oldum ki, AzTU ailəsi – onun professor-müəllim heyəti, tələbələri, əməkdaşları nə qədər qiymətlidir və onlar istənilən çətin şəraitə uyğunlaşa, təhsilin inkişafı naminə öz bilik və bacarıqlarını səfərbər edə bilirlər.

Ötən dövr COVID-19 pandemiyasının yaratdığı çətinliklərlə müşayiət olunsa da, 2020-ci il Vətən müharibəsində Müzəffər Ali Baş Komandanımız İlham Əliyevin rəhbərliyi ilə xalqımızın şanlı qələbəsi, zəfəri ilə yaddaşlarımıza yazıldı. Bu tarixi Qələbənin əldə olunmasında AzTU tələbələri də öz Vətən borclarından alnıaçıq, üzüağ çıxdılar. Müharibədə iştirak edən 250-yə yaxın tələbə və məzunumuz universitetin və bütövlükdə ölkəmizin qüruru və fəxridir.

Vətən müharibəsində tələbə və məzunlarımız arasından 28 nəfər şəhidlik zirvəsinə ucaldı. İşğaldan azad olunan torpaqlarımızda ilk dəfə bayrağımızı ucaldanlardan biri də AzTU-nun tələbəsi oldu. Biz qəhrəman və vətənpərvər tələbələrimizlə fəxr edirik.

Əziz dostlar!

Artıq çətinliklər arxada qalmaqdadır. Biz mərhələ-mərhələ ənənəvi təhsilə qayıdırıq. Bununla belə bu dövr ərzində qazandığımız yeni təlim texnologiyaları, onlayn təhsilin verdiyi imkanlardan da yararlanmaqla tələbələrimizə yüksək təhsilin verilməsində səylərimizi daha da artırmalıyıq. Müharibə dövrü sübut etdi ki, yeni texnika və texnologiyaları mənimsəmədən hərb meydanında qalib olmaq mümkün deyil. İnanıram ki, bu şərəfli missiyanın yerinə yetirilməsində AzTU ailəsi öz səylərini əsirgəməyəcəkdir.

Müasir dövrün çağrışlarına cavab verən mühəndis kadrların hazırlanması, ölkəmizin inkişafı naminə gördüyünüz bütün işlərdə Sizə uğurlar diləyir, sağlamlıq, yüksək intellekt və səadət arzulayıram!


ZiM.Az


.
© Müəllif hüquqları qorunur. Məlumatdan istifadə etdikdə istinad mütləqdir.
Rəy yazın: