2017-ci il Mayın 6-da "Azpetrol" Şirkəti Abşeron rayonunun Masazır qəsəbəsində yeni yanacaqdoldurma məntəqəsini açıb.Şirkətin Mətbuat Xidmətindən ZiM.Az-a verilən məlumata görə, bu, Azpetrolun sayca 87-ci yanacaqdoldurma məntəqəsidir.
Yeni məntəqənin açılışında Abşeron Şəhəri İcra Hakimiyyətinin nümayəndəsi və digər qonaqlar iştirak ediblər.
Məntəqənin açılışı zamanı "Azpetrol" Şirkətinin baş direktoru Ceyhun Məmmədov qeyd edib ki, yeni yanacaqdoldurna məntəqəsinin açılışı ümummilli lider Heydər Əliyevin doğum günü ərəfəsinə təsadüf etdiyindən xüsusilə əlamətdardır: "Bildiyimiz kimi, Prezident İlham Əliyev Azərbaycanda yeni iş yerlərinin yaradılmasını daim öz şəxsi nəzarəti altında saxlayır və bu prosesin sürətləndirilməsi üçün zəruri tədbirlərin görülməsi barədə göstərişlər verir. Ölkə başçısı eyni zamanda regionlarda yeni istehsalat və xidmət sahələrinin təşkili vasitəsilə dayanıqlı yeni iş yerlərinin yaradılmasının vacibliyini həmişə vurğulayır. Biz Prezidentin qərar və göstərişlərini əsas tutaraq, bu gün Masazır qəsəbəsində şirkətimizin yeni, sayca 87-ci yanacaqdoldurma məntəqəsini böyük təntənə və iftixar hissiylə istismara veririk. Onu xüsusi qeyd etmək istərdim ki, burada yeni məntəqənin istifadəyə verilməsi ilə 41 daimi iş yeri açılır ki, bu da bizim fəaliyyətimizin əsas istiqamətlərindən biridir.
Bu gün Masazır sakinlərinin və buraya gəlib-gedən qonaqların istifadəsinə verilən yeni yanacaqdoldurma məntəqəsi gördüyünüz kimi, orijinal və nəfis dizayna malikdir. Bu cür obyektlər qonaqları yüksək səviyyədə qəbul etməyə, onlara müasir xidmət göstərməyə geniş imkan yaradır. Bu, onu göstərir ki, indi Azərbaycanın bölgələri də ən müasir infrastrukturla təchiz edilir, regionlarda dünya standartları səviyyəsində obyektlər inşa olunur".
Baş direktor çıxışında onu da vurğulayıb ki, ümummilli liderin siyasi kursunu inamla davam etdirən Prezident İlham Əliyev ölkəyə rəhbərlik etdiyi 14 ilə yaxın bir müddətdə iqtisadi strategiyanın prioritet istiqamətlərindən biri olan sahibkarlığın inkişafına daim önəm verib. Prezidentin qeyd etdiyi kimi: “Sahibkarlığın inkişafı Azərbaycanın ümumi inkişafının əsas şərtidir. Ona görə sahibkarlara maksimum sərbəstlik verilməlidir və verilir. Son vaxtlar qəbul edilmiş qərarlar, qanunlar, verilmiş sərəncamlar bu məqsədi güdür ki, sahibkarlara heç kim mane olmasın, süni əngəllər aradan götürülsün, sahibkarlar maksimum dərəcədə sərbəst, rahat şəraitdə işləsinlər, ölkəmizə vəsait qoysunlar, iş yerləri yaratsınlar və Azərbaycanda biznes mühiti daha da yaxşılaşsın".
Qeyd edək ki, "Azpetrol" Şirkəti bundan sonra da Bakı şəhərində yanacaqdoldurma məntəqələr şəbəkəsini genişləndirməyi planlaşdırır.
Şirkət iyulun 15-də Qaradağ rayonunda daha bir YDM-ni açacaq.
ZiM.Az
.
Muəllif huquqları qorunur. Məlumatdan istifadə etdikdə istinad mutləqdir.
