BU DOSTLUQ HAQDA YAZIMI MƏNSUM İBRAHİMOV, RƏŞAD MƏCİD, QULU AĞSƏS DOSTLUĞUNA HƏSR EDİRƏM. Təsdiqə ehtiyacı olmayan bir həqiqətdir:
hər bir insanın yaxşı dosta, ürək sirdaşına ehtiyacı var.
Ona görə hər bir insan yaşına, peşəsinə, sənətinə baxmayaraq özünə ürək dostu axtarır.
Yaxşı dost əvəzsiz, dəyəri ölçüyə gəlməyən bir sərvətdir. Həzrəti İmam Əli (ə) buyururdu:
"Dost yaxınların ən yaxınıdır."
Dostluqda sədaqətli olmaq həmişə qiymətləndirilib. Bəlkə də elə dost mənasının böyüklüyü də bundandır.
Aqillərin müdrük sözü var: Əsl dost ürəyinin bütün gizlinlərini açıb söyləyə bildiyin insandır.
Başqa bir aqil" qardaşın necə adamdır?!- sualına qısa cavab verib: Bilmirəm, yoldaşlıq, dostluq etməmişəm.
Mənə elə gəlir ki, dünya yaranandan dost sözü də yaranıb. Və bütün dövrlərdə insanlar özlərinə etibarlı dost, yaxın sirdaş axtarıblar.
Dost dosta tən gərək,
Tən olmasa gen gərək...
Bu, bir atalar sözüdür. Dostlar arasında saf niyyətə, paklığa bir işarədir.
Tarixdə izi qalan dost münasibətlər barədə həmişə iftixarla söhbət açılıb.
Bu cür dostluqlar təmənnasız, ülvi, müqəddəs niyyətlərə köklənmiş hisslərdir.
Yaxşı dost tapmaq asandırmı?!
Münasibətdə olduğun hər adama dost demək olarmı?!
Dostunu göstər, sənin kim olduğunu deyim. Bu müdrüklərin əsrlərin dərinliklərindən gələn sözüdür.
Yaşım çox olmasa da, həyat yollarında xeyli yaşlı adamlar görmüşəm, onların müdrük fikirlərini eşitmişəm. Onlar həyatda ən böyük qazanclarını ömür payında qazandıqları dostlarını sayıblar.
Kim nə deyir-desin. Məncə dostluq üçün yaş fərqi elə də önəmli deyil. Mən bunu öz təcrübəmdə görmüşəm. Azərbaycanın xalq artisti, səhnəmizin Məcnunu, el istəklisi Mənsum İbrahimovu kim tanımır?! Gözəl səs, şirin avaz, xoş sima, yüksək alicənablıq, adı hər yerdə sonsuz hörmət və məhəbbətlə çəkilən Mənsum müəllim kimi ziyalılarımızla ancaq fəxr etmək olar. Aramızdakı yaş fərqinə görə ata-oğul münasibətindəyik. Həmişə bu böyük sənətkardan hədsiz qayğı və diqqət görmüşəm. Nə yaxşı ki, yaxşılar var. Mənsum müəllimlə xoş ünsiyyətlərimiz bizi mehriban dostlara çevirib. Bu, mənim üçün böyük iftixar, Mənsum müəllim kimi ürəkləri fəth etmiş sənətkardan misilsiz bir alicənablıq...
Hər görüşümüz yaddaşlara hopan bir xatirədir. Bizim kimi gənclərin belə ustad sənətkarlardan, böyük ürək sahiblərindən öyrənməyə, nəsə əxz etməyə çox ehtiyacı var.
Bu dost səmimiyyətinə görə sağ olun Mənsum müəllim!
Yolçusu olduğum poeziya aləminin istedadlı yazarlarından Rəşad Məcidlə, Qulu Ağsəsi özümə həyat simvolu seçmişəm.
Rəşad müəllimlə, Qulu müəllimin poetik nümunələri mənim üçün əlçatmazdır.
Rəşad Məcidlə, Qulu Ağsəsin şeirlərini oxuyanda ruhum təzələnir. Sanki bir sehrli aləmə düşürəm.
Sadə, səmimi qayğıkeş, son dərəcə diqqətli bir insandırlar mənim üçün Rəşad müəllimlə, Qulu müəllim.
İlk tanışlıqdan başlanan bu münasibət bu gün də davam edir.
Və mən gənc şair-yazar Fuad Biləsuvarlı istedadlılarına və şəxsiyyətlərinə dərin hörmət bəslədiyim bu üç insanla dostluq səadətindən çox məmnunam...
Dost, yoluna qollarımı,
Körpü kimi uzatdım keç.
Mən də indi yalqızam çox,
Gəl tək qoyma məni də heç.
Təvözükar insan oldum,
Düzlüyümlə qazandım ad.
Dostların qeydinə qaldım,
Heç kimsəyə olmadım yad.
Vətənimdə ağbirçəyə,
Anam dedim, zənən dedim.
Dostlarımın dərdlərinə,
Çəkinmədən tənəm dedim.
Dostum mənə qardaş, əmi,
Dostum mənə bibi, bacı.
Ömür boyu həyatımda,
Dostum başda qızıl tacım.
Dostluq bağım gül-çiçəkli,
Heç ətrindən doymaq olmur.
Dostlarım bir güldülər ki,
Payızda da vallah solmur...
Fuad Biləsuvarlı
Azərbaycan Yazıçılar Birliyinin üzvü,
"Cəsarətli qələm" mükafatçısı
.
Muəllif huquqları qorunur. Məlumatdan istifadə etdikdə istinad mutləqdir.
