Dil hər bir millətin özünə xas olan ünsiyyət vasitəsidir. Hər xalqın dili gələcək nəsillərə mirasdır. Bu mirası qoruyub gələcək nəsillərə ötürmək hər bir millətin şərəfli borcudur. Çox təəssüf ki, bu gün öz dilində danışmaqdan imtina edərək öz intelligentliyini sübut etmək üçün başqa dilə müraciət edənlər çoxdur. Yaşadığımız cəmiyyət öz körpəsinə xarici dildə layla deyən analar, valideynlər yetişdirir. Ana dili bizə ana südü, ana laylası ilə beynimizə həkk olunur. Təəssüf ki, analarımız ana laylası ilə körpələrinin beyinlərinə xarici dili həkk edirlər. Dil açan körpənin dili ana, ata əvəzinə “mama”, “papa” ilə açılır. Məktəbə gedən uşaq öz dilində təhsil almaq yerinə hansısa başqa dildə təhsil alır, öz dilindən, ədəbiyyatından, milliliyindən uzaq düşür. Hər valideynin arzusu uşağını rus, ingilis dilli məktəblərə qoymaq, bu dilləri mənimsəməsi ilə gələcəyini təmin etməkdir. Gələcəkdə iş yeri tapmaq, işlə təmin olunmaq üçün bu dilləri bilmək şərtdir. Azərbaycan dilini hansı səviyyədə bilmələri isə önəmsənilmir. Öz ana dilini bilməyən vətəndaş necə “Mən azərbaycanlıyam!” söyləyə bilər ki, azərbaycanlı olduğu halda, Azərbaycan dili ona yaddır. Damarlarında azərbaycanlı qanı axdığı halda, azərbaycançılıqla arasında sədd var. Küçədə valideyn uşağı ilə rusca danışır, sual verirsən “Ey valideyn, öz dilin olduğu halda niyə rus dilində danışırsan?”, cavabı “Rus məktəbinə gedir, rus dilini mükəmməl örgənməlidir, ona görə də rus dilində mütəmadi ünsiyyət vacibdir”. Nə sözümüz ola bilər bu tip valideynlərə, çünki cəmiyyət onlardan bunu tələb edir.
1956-cı ildən Konstitusiyaya əsasən Azərbaycanın dövlət dili Azərbaycan dilidir. Bu gün statistikaya əsasən 45 – 50 milyon şəxs Azərbaycan dilində danışır. Lakin gördüklərim bu statistik göstəricinin üstündən qara bir xətt çəkir. Artıq 3 ildir ki, Azərbaycanda yaşayıram və hər gün öz dilində danışmayan və yaxud danışa bilməyən onlarla əslən Azərbaycanlı olduqları halda ruhən başqalaşmış insanlar görürəm.
Başqa dillərdə danışmağı özlərinə alicənablıq bilirlər. Bu faciə telekanallardan da yan keçmir. Çıxıb verilişdə Azərbaycan dilinə xas olmayan başqa dildə sözlər işlədirlər. Onlar nəzərə almırlar ki, ekran qarşısında rus və yaxud ingilis dilində bir kəlmə bilməyən insanlar – qoca nənələr, babalar da var. Azərbaycanda yaşadığımız halda, biz başqa dildə danışmağa məcbur deyilik. Əksinə burada yaşayan qeyri-millətlərə məcbur öz dilimizi örgətməli və sevdirməliyik. Məşhur gürcü yazarı Cavcavadze söyləyir: “Neçə dil bilirsən, o qədər adamsan”. Lakin bu dəlalət etmir ki, öz dilində danışmaqdan imtina edəsən. Başqa dilləri örgənmək, bilmək bir uğurdur. Düşmənini məhv etmək istəyirsənsə, ilk öncə onun dilini bilməlisən. Düşmənlərimiz olan ermənilərin belə dilini örgənməliyik ki, onlar üzərində qələbə çalaq. Ancaq öz dilimizi atmamaq, yadırğamamaq şərti ilə.
Bəzi Azərbaycan ailələrində rus dilində danışırlar, rus kanallarına baxırlar. Bu ailədə hansı azərbaycançılıqdan söz gedə bilər ki, İranda, Gürcüstanda öz ana dilində təhsil almaq, öz doğma dillərini itirməmək üçün savaşan yüzlərcə, minlərcə insanlar olduğu halda, bu gün yüzlərcə, minlərcə insan bu dildə danışıb, təhsil almaqdan imtina edir.
Hz. Əli buyurmuşdur: “Hər insan öz dilinin altında gizlənib”. Bəs bu gün öz dilində danışmayanlar hansı qeyri-azərbaycan dilinin kölgəsində gizlənib!!!!!
Muəllif huquqları qorunur. Məlumatdan istifadə etdikdə istinad mutləqdir.
