Din hər bir normal insanın iman gətirdiyi, yaradanı ilə danışdığı, yaradanına şükür etdiyi vasitədir. İslam dini dünyada 1milyard 200 milyona yaxın müsəlmanın olduğu ən sonuncu haqq dindir və bu rəqəm günü-gündən artır. İslamın haqq din olduğuna iman gətirənlər çoxalır.Müsəlman müsəlmanın qardaşıdır. İslam sülh dinidir. Tərcüməsi də məhz “sülh”, “salam” deməkdir. Mən dinimi çox sevirəm. Lakin sevmədiyim dini cərəyanlar, təriqətlərdir. İslam dinini parçalamaq müsəlman olaraq ürəyimi parçalayır.
Şiə, sünni, vəhhabi islamın qondarma cərəyanlarıdır. Fərqli namaz qılsalar da məqsəd birdir – Allaha ibadət etmək. Əli bağlı və ya əli açıq...
İslam insanlar tərəfindən firqələrə bölünüb. Əsas buyurulan namaz qılmaq, oruc tutmaq, zəkat vermək və ömründə bir dəfə də olsa Həcc ziyarətində olmaqdır. Quranda şiə, sünni cərəyanları yoxdur. Tanrı bizə müsəlman olmağı əmr edir, şiə, sünni və ya vəhhabi olmağı deyil. Dünyada 35 ölkə əhalisinin çoxu müsəlmandır. 28 ölkənin rəsmi dini islam olsa da, dini radikallıq heç bir müsəlman ölkəsindən yan keçmir. Onlar şiə, sünni, vəhhabi kimi cərəyanlara ayrılırlar, hansı ki, bu cərəyanlar dünya müsəlmanları arasında sülh, barış olmasına mane olur, “müsəlman müsəlmanın qardaşıdır” fikrini inkar edir. Şiə şiənin, sünni sünninin qardaşı, vəhhabi vəhhabinin əxisidir. İslam dininin öz içindən parçlanması, cərəyanların bir-birinə düşman kəsilməsi dinimizi ləkələmək istəyənlərin işini asanlaşdırır. Onların görmək istədikləri tamaşanı – müsəlmanın müsəlmana düşman olmasını dinimizi cərəyanlara bölməklə göstərirlər.
Rus imperatoru I Pyotr vəsiyyətnaməsində müsəlmanların birləşməsinə izn verməməyi tövsiyə edir. Əgər islamda olan cərəyanlar birləşib, şiə, sünni, vəhhabi deyil, sadəcə müsəlman olsalar, müsəlman ölkələri daha da inkişaf edib, qüdrətlənər. İslam barış dinidir. İslam bölünmür. Quranda cərəyanlar olmadığı halda, biz müsəlmanlar niyə cərəyanlara bölündük. Əsl müsəlmanın məqsədi islamın qaydalarına düzgün əməl etmək, Allahına ibadət etmək, yaradanını zikr etmək olduğu halda, bu cərəyanlardan birini seçməkləri düzgündürmü! Niyə biz özümüzü müsəlmanla yanaşı şiə, sünni, vəhhabi adlandırırıq. Niyə sünnilər möhürsüz, şiələr möhürlə namaz qılır. Və hərəsi öz doğruluğunu, məntiqini isbat etmək üçün münaqişələr yaşayırıq, istər başını daş üstündə, istər torpaq üstündə qoy, əsas odur ki, ürəyində Allah eşqi ilə məqsədin tanrına səcdə etmək olsun. Zənnimcə cərəyanlar ayə və hədisləri fərqli anlamaqdan irəli gəlir. Çünki Hz.Peyğəmbərin zamanında cərəyanlar olmayıb. Peyğəmbərimizin yaşadığı dövrdə cərəyanlara ehtiyac yox idisə, bu gün onlara nə ehtiyac var ki, bu uydurma cərəyanlar müsəlmanı müsəlmana qarşı qoyur.
Al-ı İmran surəsi 103-də göstərilir:
Birlikdə Allahın ipinə (Qurana) möhkəm sarılın, parçalanıb bölünməyin. Ey müsəlmanlar, sizə bu bəs etmirmi parçalanmamaq üçün!!!
Muəllif huquqları qorunur. Məlumatdan istifadə etdikdə istinad mutləqdir.
