Məktəb tək bilik vermir, həm də vətənpərvər vətəndaş yetişdirir

 Məktəb tək bilik vermir, həm də vətənpərvər vətəndaş yetişdirir Noyabrın 15-də Bakının Səbail rayonunda yerləşən 6 saylı tam orta məktəbdə respublikamızda “Bayraq Günü”, “12-noyabr Konstitusiya” və “Dirçəliş Günü”nə həsr olunmuş şagirdlərin hazırladıqları möhtəşəm bayram tədbiri keçirilib.

Tədbirdə şagirdlər Vətənə, bayrağa, torpağa həsr olunmuş şeir və mahnılar səsləndiriblər.
XIX əsrin görkəmli tarixçisi Mirzə Adıgözəl bəyin “Qarabağnamə” adlı tarixi əsərindən bir parçanın şagirdlərin ifasında səhnələşdirilməsi tədbir iştirakçılarının
daha da marağına səbəb olub.

1736-cı ildən 1828-ci ilədək Qarabağın siyasi olaylarından bəhs edən "Qarabağnamə" əsərinin mahiyyətini dərk edərək Azərbaycan tarixinə səyahət
edən şagirdlər rollara girərək Azərbaycanın müstəqilliyi, bütövlüyü uğrunda gedən mübarizəni daha qabarıq olaraq iştirakçılara çatdıra bildilər. Balaca aktyorlar səhnədə alqışlarla qarşılandılar.

Tədbirdə iştirak edən rəsmi qonqalar şagirdlərin çıxışlarından zövq aldıqlarını bildirərək qeyd etdilər ki, belə istedadlı şagirdləri olan məktəb gələcəkdə bu
şagirdləri ilə fəxr edəcək.

Sonda məktəbin direktoru Gülşən Orucova çıxış edərək tədbirin təşkilatçılarına öz təşəkkürünü bildirdi və şagirdlərin çıxışlarındakı təbiiliyin onu duyğulandırdığını
vurğuladı.

Maral Sultanqızı,
AzTU-nun mətbuat xidmətinin əməkdaşı.



.
© Müəllif hüquqları qorunur. Məlumatdan istifadə etdikdə istinad mütləqdir.
Rəy yazın: