Eynəli bəy Sultanov haqqında çap edilmiş iki monoqrafiyanın təqdimatı olub

AMEA Naxçıvan Bölməsinin İnformasiya şöbəsindən ZiM.Az-a bildiriblər ki, bu günlərdə AMEA Naxçıvan Bölməsində Bölmənin İncəsənət, Dil və Ədəbiyyat İnstitutu və Mərkəzi Elmi Kitabxananın birgə təşkilatçılığı ilə yazıçı-publisist və maarifçi-pedaqoq Eynəli bəy Sultanov haqqında çap edilmiş iki monoqrafiyanın təqdimat mərasimi olub.

Tədbiri kitabxananın direktoru Nuridə Kəngərli açaraq bildirib ki, Naxçıvan Muxtar Respublikası Ali Məclisi Sədrinin 15 fevral 2016-cı il tarixli “Eynəli bəy Sultanovun 150 illik yubileyinin keçirilməsi haqqında” Sərəncamına əsasən bu il muxtar respublikada ədibin həyat və çoxşaxəli yaradıcılığı ilə bağlı konfranslar, sərgilər təşkil olunur, elmi araşdırmalar aparılır. AMEA Naxçıvan Bölməsi İncəsənət, Dil və Ədəbiyyat İnstitutunun Folklorşünaslıq şöbəsinin müdiri Elxan Məmmədovun (Yurdoğlu) tərtib etdiyi filologiya üzrə fəlsəfə doktorları İzzət Maqsudovun “Eynəli bəy Sultanovun həyat və yaradıcılığı” və İradə Əsədovanın “Eynəli bəy Sultanovun yaradıcılıq yolu” monoqrafiyaları bu sərəncamın icrası istiqamətində həyata keçirilən ən ömənli tədbirlərdən biridi.
Qeyd olunub ki, gənc alim Eynəli bəy Sultanovun folklorşünaslqı irsi ilə bağlı tədqiqatlar üzərində işləyir. Buna baxmayaraq Elxan Məmmədov nəinki Eynəli bəy Sultanovun folklorla əlaqəsini, folklor yaradıcılığını, həmçinin onun bütövlükdə yaradıcılığının qaranlıq qalan məqamlarını, ictmaiyyətə bəlli olmayan tərəflərini də öyrənir, təbliğ edir. Gənc tədqiqatçı yazıçı-publisist və maarifçi-pedaqoq Eynəli bəy Sultanov haqqında vaxtı ilə yazılmış məqalələri ölkəmizin arxiv və kitabxanalarından, hətta ölkə hüdudlarından kənarda da araşdırır. O da vurğulandı ki, bu günlərdə Elxan Məmmədov İstanbul Universitetinin Kitabxanasından Eynəli bəy Sultanov haqqında yazılmış bir məqaləni üzə çıxararaq Azərbaycan türkcəsinə çevirmiş və həmin məqaləni ölkənin müxtəlif mətbu orqanlarında dərc edirərək geniş oxucu kütləsinə təqdim edib.

Təqdimat mərasimində AMEA Naxçıvan Bölməsinin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev “Eynəli bəy Sultanovun ədəbi irsi və onun tədqiqi məsələləri” mövzusunda məruzə edib.

Məruzə ətrafında AMEA Naxçıvan Bölməsinin İncəsənət, Dil və Ədəbiyyat İnstitutunun Musiqi və Teatr şöbəsinin böyük elmi işçisi, sənətşünaslıq üzrə fəlsəfə doktoru Ələkbər Qasımov və həmin institutun Ədəbiyyatşünaslıq şöbəsinin böyük elmi işçisi Əli Həşimov çıxış edərək Eynəli bəy Sultanov irsinin üzə çıxarılması, tanıdılması, təbliği istiqamətində gənc alimin xidmətlərindən bəhs ediblər.

Tədbirin sonunda “Eynəli bəy Sultanovun həyat və yaradıcılığı” və “Eynəli bəy Sultanovun yaradıcılıq yolu” monoqrafiyaların tərtibatçısı Elxan Məmmədov (Yurdoğlu) çıxış edərək hər iki kitabın nəşrinin həyata keçirilməsindən danışıb.

.