Meşə təbiətin ən qiymətli, vacib, əvəzolunmaz komponentidir. Meşə olmasa, bütün canlı varlıq, sivilizasiya məhv olar. Meşə şairlərin, rəssamların ilham mənbəyidir. İnsanlara gözəllik hissi, sevinc duyğuları bəxş edir. Dünyanı meşəsiz təsəvvür etmək mümkünsüzdür. Meşələr bizim təbii sərvətimiz, onu qorumaq isə vətəndaşlıq borcumuzdur. 23 May 2016-ci ildə yazmış olduğum “TƏBİƏTDƏ İZİ QALAN MEŞƏÇİLƏR” kitabında yer almış, öz peşəsinin vurğunu olan Şabran Meşə Mühafizəsi və Bərpası Müəssisəsinin direktoru Bəybala Ağa oğlu Allahyarova təqdim etmək üçün Şabrana yollandım. Yol boyu Bakı-Quba yolunun kənarlarında, bitmə şəraiti çətin olan torpaqlarda Ekologiya və Təbii Sərvətlər Nazirliyi tərəfindən salınmış qarşıq meşə əkinlərini və 1965-1975-ci illərdə Azərbaycan SSR Meşə Təsərrüfatı Komitəsinin sədri Mehdi Mustafayevin işlədiyi dövrdə Dəvəçidə (indiki Şabranda) akademik Həsən Əliyevin , akademik İbrahim Səfərovun və meşəçi alim Sərdar Sultanovun rəhbərliyi ilə salınmış meşə zolaqlarını gördüm heyran oldum. Hal-hazırda Şabran rayonunda meşələrin genişləndirilməsində böyük əməyi olan Bəybala Ağa oğlu Allahyarovla görüşdük və yazmış olduğum kitabı ona təqdim etdim. Öz peşəsinin vurğunu olan Bəybala Allahyarov kimdir? O, 1961-ci ildə Xaçmaz rayonunun Qaraçay-cek kəndində dünyaya gəlmişdir. 1981-ci ildə Qaraçay-cek kənd orta məktəbini bitirmiş, respublikadan kənarda təhsil alan tələbələrin sırasında Bəybala Ağa oğlu Allahyarovun adı da yer almışdır. O,1981-ci ildə Rostov vilayətindəki Noveçerkassk Meliorasiya Mühəndisləri İnstitutunun meşə təsərrüfatı fakültəsinə daxil olmuşdur. 1986-cı ildə institutu bitirmiş, meşə təsərrüfatı mühəndisi ixtisasına yiyələnmişdir.
B.Allahyarov təyinatla Şabran Meşə Təsərrüfatı İdarəsində meşəçi mütəxəssis kimi əmək fəaliyyətinə başlamışdır. O, 1986-cı ildə Şabran Meşə Təsərrüfatı İdarəsində meşə ustası, 1986-1989-cu illərdə baş meşəçi, 1989-2001-ci illərdə isə o ilk əmək fəaliyyətinə başladığı bu idarəyə rəhbərlik etmişdir.
2002-ci ildən bu günə kimi Şabran Meşə Mühafizəsi və Bərpası Müəssisəsinin direktoru vəzifəsində çalışır.
B.Allahyarov işlədiyi dövrdə 1000 hektardan artıq müxtəlif ağac cinslərindən ibarət olan meşə əkinləri salınmışdır.
Hazırda bu meşə əkinləri göz oxşayan qalın meşələrə çevrilmişdir.
Onun gördüyü işlər “Azərb.meşə” İstehsalat Birliyinin Həmkarlar Təşkilatı tərəfindən keçici qırmızı bayrağa layiq görülmüşdür.
Bəybala Ağa oğlu Allahyarov 2010-cu ildə “Tərəqqi” medalı ilə təltif olunmuşdur.
Bəybala Allahyarovun təşəbbüsü və rəhbərliyi ilə 100 illik adlanan sahədə terras üsulu ilə salınmış qarışıq ağac cinslərindən ibarət meşə əkinlərinin bir görüntüsü
Şəkildə soldan-sağa: Bəybala Allahyarov və meşə əkinləri üzrə usta Əmirxan Tahirov.
***
Görkəmli meşəçi alim Faiq Əmirov Şabran Meşə Mühafizəsi və Bərpası Müəssisəsinin direktoru Bəybala Allahyarova Azərbaycan Respublikası Həmkarlar İttifaqının kecici qırmızı bayrağını təqdim edərkən
***
Bəybala Allahyarovun özünün saldırdığı şam meşə əkinlərinə baxış keçirərkən (2013)
ƏLLƏZ ORMEŞƏNLİ,
Azərbaycan Yazıçılar Birliyinin və
Azərbaycan Jurnalistlər Birliyinin üzvü.
"Şərqin səsi" qəzetinin şöbə müdiri.
.
© Müəllif hüquqları qorunur. Məlumatdan istifadə etdikdə istinad mütləqdir.
