Ceyhun Hacıbəylinin “Seçilmiş əsərləri”-nin təqdimat mərasimi keçirilib

ZiM.Az xəbər verir ki, Azərbaycan Respublikasının Prezidenti İlham Əliyevin “Ceyhun Hacıbəy­linin
125 illik yubileyinin keçirilməsi haqqında”
2015-ci il 19 noyabr tarixli Sərəncamına əsasən təsdiq edilmiş Tədbirlər Planına uyğun olaraq
nəşr olunan kitabın təqdimat mərasimini
giriş sözü ilə AMEA-nın vitse-prezidenti,
Nizami Gəncəvi adına Ədəbiyyat İnstitutunun
direktoru, Millət vəkili, akademik
İsa Həbibbəyli açıb.

O, bildirilib ki, “Azərbaycan
mühacirət ədəbiyyatı kitabxanası” zəngin mühacirət irsimizin təqdimi və təbliği baxımından Ədəbiyyat İnstitutunun atdığı mühüm addımlardan biridir. Bu istiqamətdə işlər davam etdirilir.

İnstitutun direktoru dövlətimizin başçısının Azərbaycan Xalq Cümhuriyyəti ilə bağlı sərəncamları əsasında
AMEA-da görülmüş işlərdən danışaraq qeyd edib ki, C.Hacıbəylinin “Seçilmiş əsərləri” də bunlardan biridir.
Akademik İ.Həbibbəyli C.Hacıbəylinin həyat və fəaliyyətindən bəhs edib, onun milli ədəbi-ictimai fikir tarixinə böyük töhfələr verdiyini vurğulayıb. Bildirilib ki, yeni nəşr C.Hacıbəylinin irsinin öyrənilməsi baxımından böyük əhəmiyyət daşıyır.

Kitabın “Ön söz” və qeydlərin müəllifi filologiya üzrə elmlər doktoru Abid Tahirli
“Ceyhun Hacıbəylinin əsərlərinin nəşri tarixindən” mövzusunda məruzə ilə çıxış edib.

Daha sonra AMEA-nın müxbir üzvü Tehran Mustafayev, filologiya üzrə elmlər doktoru, professor Vüqar Əhməd, C.Hacıbəylinin fransız dilli ədəbi-elmi irsinin tərcüməçisi Mirzəbala Əmrahov, kitabın məsul redaktoru Nizami Gəncəvi adına Ədəbiyyat İnstitutunun Azərbaycan mühacirət ədəbiyyatı şöbəsinin müdiri, filologiya üzrə elmlər doktoru Nikpur Cabbarlı, professor Telman Ağdamski, tarix üzrə elmlər doktoru Solmaz Tohidi, gənc tədqiqatçı Dilqəm Əhməd və başqaları təqdim olunan kitabın məziyyətindən danışıblar.

Sonda Mirzəbala Əmrahov ədibin nəvəsi Kleman Hacıbəylinin tədbir iştirakçılarına ünvanladığı məktubu səsləndirib.

Qeyd edək ki, AMEA-nın vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəylinin baş redaktorluğu ilə “Elm” nəşriyyatında nəşr edilən və Azərbaycan mühacirətinin ədəbi-elmi irsinin geniş ictimaiyyətə təqdimatı məqsədi daşıyan seriyanın ikinci kitabında XX əsr Azərbaycan ədəbiyyatının tanınmış nümayəndələrindən biri olan Ceyhun Hacıbəylinin (1891-1962) mühacirət illərində qələmə aldığı bədii-publisistik əsərlər və elmi araşdırmalar yer alıb.

Kitabın məsul redaktoru filologiya üzrə elmlər doktoru Nikpur Cabbarlı, kitabın tərtibçisi,
“Ön söz” və qeydlərin müəllifi filologiya üzrə elmlər doktoru Abid Tahirlidir.

Müşfiq BORÇALI,
ZiM.Az


.